« 18年一遇的稀客 | 網頁 | Ennio Morricone那詩意的樂章 »
2007.02.21
K場現形記
新正頭, 有乜好搞作?
賀歲片真是一點都不熱鬧, 與當年"八星報喜", "富貴逼人" 那種氣勢真的差很遠呢.
前兩天為了應節, 還特意找來周星馳的"行運一條龍"來重溫 (九年前的電影!!). 有沒有人知道, 電影中的"好運茶餐廳"在甚麼地方? 我以前一直以為在太子的. 不知這餐廳至今還在不在.
年卅十(星期六)當天下午, 與家人去了維園的年宵市集, 本來想看看演藝學院同學賣豬公仔的攤檔, 但人太多最後只好作罷. 因為街上逼人, 一家四口推著bb車最後毅然走入糖街的CEO唱K. 別笑我, 我對上一次同一大班朋友在香港去唱K是1999年, 此後幾乎絕跡K場. 這兩三年因為暑期回國內機會多, 反而去年在溫州陪同學唱過. 不過也只是敬陪末座, 坐在一旁喝喝酒, 聊聊天, 不敢掠人之美.
大學時代對唱K還相當反感, 一來從前覺得廣東流行曲太膚淺, 喜歡Alan及Leslie都不好隨便張揚; 二來覺得唱K這娛樂也太自私及反智. 一大班朋友幾年不見, 邀約出來竟然沒事可談, 各只關心自己點的歌, 對著屏幕哼著熟悉的調子就由夜深嗌到天亮. 我一直覺得K場無真愛, 因為只有自己拎起支咪的那刻才是一切 (有幾多人甘心只聽人唱歌?), 如果大夥兒去看電影, 喜怒哀樂的感情起落最少人人均等.
另一令我討厭的是那些伴唱MTV永遠的壞品味, 粗製濫造, 拍景拍人全都俗不可耐. 不要說今天回看會覺得老土可笑, 當年唱K時其實已覺得不堪入目. 今天製作的似乎好一點, 但與我心目中最基本的MTV指標, 仍是所去甚遠.
一大幫朋友, 最慘是遇上五音不全者, 以前沒有唱K這玩意, 什麼是"五音不全"還不大確定. 後來才知道有人音樂感嚴重殘障, 可憐的整句歌詞連一個音都捉不準.
多年未遇, 今天再進K房, 對我而言什麼都是新事物. 我總是覺得, 唱K這娛樂真的不會老化, 即使電影院沒落了, 唱K也許依然熱鬧. 始終拿著咪高峰的感覺更實在, 自我更能突出.
唱K也是老餅與新鮮人壁壘分明的舞台, 最受歡迎的K歌流行榜, 我幾乎聞所未聞, 即使有些聽過, 也許都嗤之以鼻. 常覺得好多歌手接受訪問連講句話都不行, 語言無味, 怎可能是眾人的偶像?! 他們的歌即使旋律及歌詞再好, 都不可能是我那杯茶.
但另一方面, 對自己年代的歌手及歌曲又無比的包容, 總覺得以前的才是明星, 以前的才是好歌. 這也是我在溫州K房敬陪末座的原因, 因為當好多歌其實只有自己聽過或喜愛, 也就無謂破壞人家的雅興. 越是多年沒唱K, 就越覺自己不合時宜了.
唱K似乎也是很本土化的玩意, 願知情者相告, 有沒有更多歐西流行曲的k場? (現在還有人會說"歐西流行曲"嗎?!) 我發覺CEO的規模雖大, 但外文歌卻乏善足陳, 香港那些讀翻書的uncle及auntie, 要唱Elvis Presley, Frank Sinatra, Abba 或 Peter Paul & Mary, 會去甚麼地方蒲多?
如果你問我, 今晚到底去打牌, 唱k定睇戲好? 我第一個反應是"有冇搞錯?", 睇戲怎可能與打牌同唱K並列而談?! 不過香港人公餘時間說來說去這幾種娛樂, 過年更是無賭不歡, 多少顯示了這地方的人生活模式單調, 連娛樂都一面度的異化.
又有甚麼方法? 連唔知阿邊個初三去車公廟求神問卜, 都話仙人指路勸香港人應該團結一致! 頂你個肺, 這種"搞好經濟"的論調還要無限上綱到那個層次, 方肯罷休?!
要搞好經濟麻, 香港人繼續打牌, 唱k同睇戲喇~~~諗咁多仲乜, 唔駛搵食呀?!
我還聽過一些關於唱K的荒謬故事, 比如在節奏急速的上班日, 中午一面吃飯一面還可以唱K, 香港人喜歡唱K的程度已是無遠弗屆. 國內的大學生對我說, 他們唱K只唱半支歌, 因為要搶時間, 中間的過場音樂太浪費了, 所以每首歌只唱一半就CUT掉.
天, 連娛樂都要用時間換取空間, 鬥高效率鬥多快好省兼慌死蝕底, 咁辛苦不如唔好做人喇. 咪話我新年流流唔好意頭......
technorati tags:行運一條龍, 卡拉ok, karaoke, lunar, new, year
Blogged with Flock
03:25 發表於 Mumble | 永久網址 | 留言 (13) | Email this
留言
衛蘭D歌唔錯ar。
昨夜和高建聊至四點幾，講及北京KTV，好多有伴唱和可以有下文的，香港K場似乎無咁XXXX 了。
發表人: 東二打六 | 2007.02.22
我知！那茶餐廳在介於弼街和雅蘭行中間的一段上海街，有閣樓，不錯的。但在塘尾道旺角度交界那邊，有間又係連閣樓的茶餐廳，個名好得，叫「中國冰室」。那裡氣氛相當悠閒，換言之即係hea爆，叫杯奶茶坐係度睇一個下午書都可以，一流。
發表人: 阿周 | 2007.02.22
家明，"行運茶餐廳"的確是在太子，地址是旺角上海街 726 號地下，鴻運冰廳餅店。可能有時行過都唔為意，但當你看到後面九龍表行的話，應該較易認出。http://www.openrice.com/big5/sr2.htm?shopid=1391
係呀，雖然以前覺得那些"八星報喜"式賀歲片十分無聊，起碼有得笑。新年流流，走去睇"門徒"，雖然不錯，但係那黑色無奈的調子總是有點不對調的感覺。
發表人: 奇夫 | 2007.02.22
係喎 點解我唔醒起問你呢?
唔該晒你呀 奇夫兄!!!
發表人: KM | 2007.02.22
賀歲片本來就可以跟農曆新年冇關係. 幾可見過以前既成龍大哥行出黎舉揮春抱拳恭喜呢!
家有囍事咪又係同新年冇關係, 但年年照睇.
發表人: Agnes | 2007.02.23
年三十晚唱Ｋ應該歌埋我嘛，哈。
居然同東二打六同周教授睇《三峽好人》同傾偈同四點幾，返到元朗屋企五點幾，真盞鬼.. 今晚同府上請教吓你《三》嗰兩隻UFO點理解... -_-?
發表人: 小高 | 2007.02.23
終於"見"到你講粗口喇, 呵~~。咁你除左唱"蜜桃成熟時"之外，仲點左邊啲歌唱啫。
發表人: 茹 | 2007.02.23
Agnes,賀年片是不是應該有些過節氣氛?家有喜事都是熱熱鬧鬧開開心心的.記得好多年前過年我租左隻黑湖妖翻屋企睇俾老豆老母鬧到我pk,香港人對過年或過年的電影應該有些預期.門徒似乎真有些破格.
小高, 東二打六今晚來不來?話時話除左范克廉樓同埋七一既維園,我真係未試過係第二度見到佢. 另周教授是誰?不會是當年報社那位吧?
茹, 好多啊, 不過都是80年代的咯,譚詠麟張國榮陳百強林子祥...我老婆反面識得衛蘭同stephy,in過我好多~~~
發表人: KM | 2007.02.23
今日行過bc,拿了今年電影節的場刊，隨手一揭，就揭到維斯康迪(I'm lovin' it)回顧展果一版(真係好邪)，心如鹿撞，另外又見右下角寫有一個由你同羅卡主持的分享會就更加雀躍。但係睇清楚D日期，全部都係四月尾至五月頭，即係會考如火如荼的日子。我馬上問自己，要會考，定要維斯康迪呢?我本能反應當然諗都唔駛諗就揀維斯康迪喇，但數秒後，冷靜下來，想:今年唔要維斯康迪，可能以後再有機會，但我今年唔要會考，就以後都再無機會。
最後，決定恨下心腸，壯士斷臂，寧捨維斯康迪，都要考好會考
對唔住ar家明，去唔到你個分享會捧你場，更加對唔往維斯康迪，希望你會諒解我。
眼白白看著自己與大師失諸交臂的感覺，很難受......
(希望家明你唔好介意我向你吐苦水 la XD~~)
發表人: David Ryoma | 2007.02.23
David Ryoma, 維斯康堤既戲大部份都出左碟, 容易搵到. 來日方長, 唔駛灰心呀. (我做學生時都錯過好多電影展. 諗番轉頭都唔算遺憾, 因為我逐部逐部睇番, 亦要多謝DVD既出現~)
KM: 賀歲片的而且確但求熱鬧開心. 好似我某舅母, 年年都要睇周潤發電影過節, "血仍未冷"都收貨. 今年佢想睇"心想事成", 俾佢女婿反駁: "60蚊睇鄭中基?!" 結果佢地係屋企睇"天行者"VCD.
發表人: Agnes | 2007.02.24
To Agnes : 多謝你關心ar，其實我一直都有儲開維斯康迪的碟，但真係好貴，之前我買左一隻criterion的 "The Leopard"，宜家仲好肉赤。 Anyway，要錯過的點都要錯過，好在睇到暑假有個Summer classic的節目，做Fassbinder 25週年紀念，算叫做有D補償。
發表人: David Ryoma | 2007.02.25
David, 先謝謝你捧場, 但來不來真的沒關係, 估計當天不可能談得太深入.
也一如Agnes所說, 很多電影都有DVD. 當然能看大銀幕就請看大銀幕, 我前陣子也在百老匯看過"洛可兄弟"及"浩氣藎河山"的菲林版, 覺得印象真比DVD好. 而這次部份放映還設在電影資料館舉行, 資料館放映設備及放映員的素養平坊間戲院要高, 所以應該是難得的機會.
是的, 今年電影節目真多, 據知還有很多黎緊, 如法國五月的Jacques Demy.
Agnes, 我是鄭中基的FANS, "心想事成"想看但一直沒時間, 希望不會落畫而飲恨喇, 老實講我想睇"心"多過"門徒"多多聲.
發表人: KM | 2007.02.25
鄭中基，點解得到你歡心啫吓？
發表人: 東二打六 | 2007.02.26